Nuk ka asnjë argument që tregon se koka është mirë të mbulohet.

Janë transmetuar disa hadithe, por janë të dobëta, dhe disa të shpikura.

Mbajtja e takijes futet te zakonet dhe traditat e veshjes te njerëzit.

Nëse një popull e ka zakon ose traditë që të mbulojnë kokën, dhe e konsideron zbukurim, atëherë është e pëlqyer të mbulohet koka në namaz, duke u bazuar te fjala e All-llahut:

{يا بني آدم خذوا زينتكم عند كل مسجد}

Kuptimi i ajetit:

{O bijtë e Ademit! Vishni rrobat e bukura (që dispononi) në çdo namaz}

Thonë dijetarët:
“Ky ajet urdhëron besimtarët të vishen përshtatshëm në namaz, që të mbulojnë pjesët që duhen mbuluar. Plus kësaj i nxit që të veshin rrobat e mira dhe të bukura që i disponojnë, rroba me të cilat shfaqen sa më bukur tek të tjerët.”

Pra, nëse një popull e konsideron mbajtjen e takijes (mbulimin e kokës) zbukurim, dhe nëse nuk e mbulojnë shikohet si turp, apo, si  gjë jo e bukur te njerëzit, siç ishte te të parët tanë, dhe te disa popuj në kohët tona, atëherë mbulimi i kokës është i pëlqyer në namaz, sepse është më parësore të zbukurohemi për All-llahun ﷻ.

Ibn Umeri i tha Nafiit kur e pa që po falej me kokë zbuluar:
“A del kështu te njerëzit? Nafi ia ktheu: Jo.
Tha ibn Umeri: All-llahu është më i meritueshëm të zbukurohesh për Të.”
[E përmend këtë transmetim shejh Albani]

Te populli jonë nuk është turp mosmbajtja e takijes apo me dal pa takije. Madje mund të jetë turp me dal me takije.

Prandaj nuk mund të themi që është i pëlqyer mbulimi i kokës në namaz te ne.

Thotë Ibn Uthejmini:
 أن ستر الرأس أفضل في قوم يُعتَبَر ذلك من أخذته الزينة،  أما إذا كنا في قوم لا يعتبر ذلك من أخذ الزينة فإنا لا نقول: إن ستره أفضل و لا إن كشفه أفضل
“Mbulimi i kokës (në namaz) është mirë (dmth: i pëlqyer) nëse jemi te një popull ku mbulimi i kokës konsiderohet prej zbukurimit në veshje.
E nëse jemi në një popull ku mbulimi i kokës nuk konsiderohet prej zbukurimit në veshje, në këtë rast nuk themi që mbulimi i kokës është mirë (i pëlqyer), dhe as që zbulimi i kokës është mirë (i pëlqyer).”
[Esh-Sherh El Mumti 2 / 166]